తన రెండవ సినిమాతోనే 75 ఏళ్ల తెలుగు సినీచరిత్రలోని అన్ని రికార్డులనూ బద్దలుకొట్టేసిన మగధీరుడు రామ్ చరణ్ తేజ. ఆయన "అతడు" సినిమా దర్శకుడు త్రివిక్రమ్ శ్రీనివాస్ దర్శకత్వంలో నటించనున్నారు. ప్రస్తుతానికి వీరిద్దరూ ఓ వాణిజ్య ప్రకటన కోసం కలసి పనిచేయనున్నారు. పెప్సీ బ్రాండ్ అంబాసిడర్ గా వ్యవహరిస్తున్న రామ్ చరణ్ ఈ సంస్థకు చెందిన ఓ ప్రకటనలో నటించనున్నాడు. ఈ ప్రకటనకు త్రివిక్రమ్ దర్శకత్వం వహించనున్నాడు. వచ్చే నెలలో ముంబైలో ఈ ప్రకటన షూటింగ్ జరుగనుందని సమాచారం. ఇక వీరిద్దరి కాంబినేషన్ లో సినిమా కూడా త్వరలో ప్రారంభంకానుంది.